Սնվելու 9.5 պատվիրանները

«9.5 շաբաթ» ֆիլմը դեռևս թարմ է շատերիս հիշողություններում։ Ինչ խոսք, դժվար է մոռանալ Ջո Քոքերի՝ նմանը չունեցող ձայնի երանգների ներքո՝ ոչ պակաս նմանը չունեցող մենապարը, բայց ցավոք, պետք է հիասթափեցնենք ձեզ․գրառումը ֆիլմին չէ նվիրված։ Չնայած, որպես հարգանքի տուրք ահա ձեզ փոքրիկ հիշեցում նրա մասին՝ սնունդի երանգներով։

Սնվում ենք բոլորս, գրագետ սնվում՝ քչերս, առողջ՝ էլ ավելի քչերս։ Բայց եթե առողջ սնվելու համար սովորաբար ինչ-ինչ գործոններ (կամ արդարացումներ) են խանգարում, ապա գրագետ սնվելու կանոնները կարող են պահպանել բոլորը։ Ահա մի քանի «պատվիրան» ՝ ճիշտ սնվելու համար։

1. Սնունդը պետք է բազմազան լինի։Սննդաբանները պնդում են, որ ափսեի երեք քառորդը պետք է լինի բանջարեղեն, մեկ քառորդը՝ միս կամ ձուկ։ Օրգանիզմը չի սիրում միանմանություն, այդ իսկ պատճառով շատ ցանկալի է միշտ համադրել բանջարեղենը մսեղենի հետ։ Իհարկե, փոքր-ինչ դժվար կլինի, օրինակ, սուշի, խինկալի, տորթ կամ աղցան միասին ուտելը, նման սննդային խառնաշփոթ նույնպես չի ակնկալվում։ Նախապատվությունը տվեք միանման ուտեստներին, որոնք անպայման պետք է «համեմել» բանջարեղենով։

2. Հետևեք օրվա «կալորիականությանը»ըստ տարիքի «բարձրացման» այն պիտի նվազի՝ հիմնականում կենդանական ճարպերի և ածխաջրերի հաշվին։ Երեսունից հետո դրանք պետք է փոքր-ինչ սահմանափակել՝ ավելորդ կիլոգրամներից խուսափելու համար։ Բայց, այ, սպիտակուցների քանակը պետք է անփոփոխ մնա։

3. Անշտապ կերեք։ Եթե ծանր աշխատանքային օրվանից հետո հոգնել եք, կամ նյարդային օր եք ունեցել, տուն վերադառնալուց կամ ռեստորան գնալիս միանգամից մի անցեք ուտելու․ մեծ է հավանականությունը, որ լարված կամ գերհոգնած ժամանակ կուտեք շատ ավելին, քան անհրաժեշտ էր ձեր օրգանիզմին, քանի որ ուտում եք «մեխանիկորեն», և, հետևաբար, արագ։ Փորձեք ճաշել կամ ընթրել առանց հեռուստացույց դիտելու կամ թերթերն աչքի անկացնելու, կենտրոնացեք ուտեստի վրա ու դանդաղ վայելեք սնունդը։ Ինքներդ էլ կզարմանաք, թե որքան արագ եք հագենում։

 

4. Երեքից հինգ անգամ սնվելը պարտադիր է։ Եվ անհրաժեշտություն չկա հինգ անգամն էլ սնվել այնքան, որ հետո անգամ շնչելը դժվար լինի։ Դրանք կարող են, ավելին՝ պետք է լինեն փոքր չափաբաժիններով, բազմազան, օգտակար ու համեղ։ Բայց ամբողջ օրը քաղցած մնալն ու ուշ երեկոյան՝ մենակով ամբողջական գառան խորովածն ուտելը ամենալավ տարբերակը չէ (հետո էլ, մենակ-մենակ ուտում եք, բա մե՞նք): 

5. Հրաժարվեք «չոր» սննդից։ Չոր մարդկանց չենք սիրում, բայց արի ու տես, որ «չոր» սնունդը միշտ ավելի շատ ենք նախընտրում։ Մսային, ձկնային, բանջարեղենային, անգամ՝ մրգային ապուրները նպաստում են ստամոքսահյութի արտադրմանը։ Եվ երբ «ծանր» կերակուրից առաջ ապուր եք ուտում, այն օգնում է արագ մարսել մսի մեծ կտորը, կամ ձեթի մեջ տապակված խրթխրթան կարտոֆիլը։ Եվ անգամ դեսերտի շաքարավազային մասն ավելի լավ կմարսվի, եթե սկզբում «ջրիկ» ուտեստ եք կերել։ Դե, մարդկանց պարագայում էլ է նույնը․ հումորով մարդիկ նույնպես նպաստում են  մթնոլորտի «թեթևացմանը»։ Այնպես որ, ինչպես կասեր Մյունահուզենը, ժպտացե՛ք, պարոնայք։ Ու ընթացքում ապուրներ կերեք։

 

6. Սպիտակուցաշատ սնունդը՝ նախաճաշին ու ճաշին։ Միս, ձուկ, հավկիթ, խյուսեր, բանջարեղեն, կաթնամթերք, և այլն։ Սրանք ավելի լավ են մարսվում լուսավոր ժամերին։ Երեկոյան կարող են հավաքվել կոնքերի հատվածում՝ ծալքերի տեսքով։ Հուշում ենք, բայց՝ չենք պարտադրում, ճիշտ-ճիշտ աստղագուշակի պես։

7. Մի մոռացեք կաթնամթերքի մասին։ Կարելի է ընտրել դրանց՝ քիչ յուղայնությամբ տարբերակները։ Օրինակ, կեֆիրը պարունակում է կենդանական սպիտակուց, որը նույնչափ օգտակար է, որքան միսն ու ձկնեղենը։ Հետո, կաթնամթերքը նույնպես նպաստում է մարսողությանը։

8. Կերեք այն ժամանակ, երբ իսկապես քաղցած եք։Երբեմն օրգանիզմը քաղցը շփոթում է ծարավի հետ։ Հենց դրա համար էլ ընդունված է մեկ բաժակ ջուր խմել՝ ուտելուց կես ժամ առաջ։ Այն և՛ լցնում է ստամոքսը՝ օգնելով ավելի քիչ ուտել, և՛ վերացնում է «սուտ» քաղցը։

9, Էլ ինչ սնունդ՝ առանց ջուր։ Ուտելն ուտելով, բայց ջուր խմելու մասին ևս պետք չէ մոռանալ։ Արի ու տես, որ մոռանում ենք, բայց իզուր։ Օրական պետք է գոնե երկու լիտր ջուր օգտագործել՝ էլի ավելի շատ ուտելուց խուսափելու, օրգանիզմը թարմ պահելու, մարսողությունը կարգավորելու համար։

0.5   Սնունդը սեր է։  Փորձեք ուտել վայելելով՝ հեռու մնալով որկրամոլությունից։

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով